SHBA: BE të lëvizë për të shpëtuar ekonominë greke

Zyrtarët amerikanë janë përherë e më të shqetësuar se kriza greke do të mund ta kthente eurozonën në recesion për të tretën herë që kur filloi kriza globale, nënvizon gazeta amerikane “The Wall Street Journal”.

Sipas gazetës, shqetësimi qëndron në faktin se një krizë e përgjithshme në eurozonë do të mund të influencojë në masë të madhe ekonominë amerikane dhe atë botërore.

Siç vihet në dukje, Uashingtoni kërkon nga liderët europianë “të lëvizin në mënyrë agresive për t’u shmangur kolapsi i ekonomisë greke”.

Sipas gazetës, sekretari amerikan i Thesarit, Jack Lew, ka patur telefonata me zyrtarë evropianë (presidentin e Eurogrupit dhe ministrat e Financave të Gjermanisë dhe Francës), si dhe homologun e tij grek, Janis Varufaqis.

Lew i nxiti të gjitha palët të avancojnë në një marrëveshje, për të evituar dobësimin e eurozonës. Sipas gazetës, zyrtari amerikan u tha bashkëbiseduesve se “kemi theksuar se do të nevojitet një rrugë konstruktive dhe realiste përpara dhe se do të lipset kompromis”.

Ndër të tjera, citohet se SHBA e ka nxitur Greqinë që “të avancojë me masat që do të ripërtërijnë zhvillimin”, por edhe partnerët europianë se “po të vazhdojnë të bëjnë kaq shumë presion ndaj qeverisë së re greke, kjo strategji ka gjasë që të shtojë rrezikun e vendit për të dalë nga eurozona”.