Shfuqizohet shkarkimi i rektorit të UP-së

Ministri kosovar i Arsimit ka shfuqizuar të enjten vendimin e Këshillit Drejtues të Universitetit të Prishtinës për shkarkimin e rektorit Ramadan Zejnullahu.

Në vendimin e tij, ministri Arsim Bajrami ka argumentuar se shkarkimi i rektorit është bërë në kundërshtim me nenet e statutit të Universitetit të Prishtinës.

Ndërkohë, në mëngjes qindra qytetarë protestuan para Ministrisë së Arsimit në mbështetje të rektorit të UP dhe për shkarkimin e anëtarëve të Këshillit Drejtues.

Protestuesit kanë kërkuar: emërimin e një organi të përkohshëm, ku gjysma e anëtarëve të tij të jenë ekspertë ndërkombëtarë; shkarkimin e dekanëve dhe emërimin e ushtruesve të detyrës; ndryshimin e ligjit për arsimin e lartë, në mënyrë që të pengohet ndikimi politik në universitete; dhe mbajtjen e zgjedhjeve në Universitetin e Prishtinës në vitin 2016.

Rektori Zejnullahu u shkarkua një ditë më parë me vendim të Këshillit, vendim ky që u kundërshtua nga autoritetet më të larta të Kosovës e që pasoi me shkarkimin e kryetares së organit, Shefkie Islamaj.