Shishja e verës hapet pas 151 vjetësh…dhe është e shpifur

Një shishe verë e gjetur në një anije të mbytur në periudhën e luftës civile, në vitin 1864 u hap nga ekspertët dhe shija e saj ishte shumë e shpifur.

Ekspertët thanë se vera, që kishte ngjyrë gri, ishte një miksim aromash squfuri, benzine, gaforreje dhe pak qitro.

Rreth 50 njerëz kishin blerë bileta për të qenë të pranishëm gjatë hapjes së shishes dhe për të shijuar verën 151-vjeçare gjatë një festivali ushqimi në Charleston, Karolinë e Jugut.

Ajo ishte një nga 5 shishet e zbuluara nga anija ‘Maria Celestia’, e cila ishte mbytur gjatë luftës civile në vitin 1864. Arkeologë nënujorë, duke kërkuar në anijen e mbytur, në vitin 2011 i gjetën shishet në një dollap të kyçur në pjesën e poshtme të saj. Eksperti i verërave, Paul Roberts u shpreh: “Kam provuar edhe më parë verëra të gjetura në anije të mbytura. Ato mund të jenë të shkëlqyera. Kjo nuk ishte”.