SLLOVAKI – Nivelet e ulëta të Danubit ekspozojnë minën detare të LIIB

BRATISLAVË, 3 gusht /ATSH-DPA/ – Rënia e niveleve të ujit në Danub ka ekspozuar një minë detare të Luftës së Dytë Botërore në Sllovaki.

Zbulimi i shtyu autoritetet të mbyllin përkohësisht një pjesë të lumit për trafik të hënën.

Policia mbylli pjesën e prekur të Danubit pranë fshatit Virt, në lindje të Bratislavës në kufirin hungarez.

Kufizimet u zbatuan edhe për anijet rekreative.

Autoritetet fillimisht iu referuan zbulimit vetëm si një “objekt i panjohur” që kërkonte mbylljen e lumit ndërsa shqyrtohej.

Pas një inspektimi fillestar nga specialistët e municioneve shpërthyese, policia tha se objekti ishte identifikuar si një minë britanike kundër anijeve e Luftës së Dytë Botërore.

Gjatë luftës, vendet strategjike në kryeqytetin sllovak Bratislavë u bombarduan rëndë, përfshirë rafinerinë e naftës Apollo dhe portin e afërt të Danubit.

Minat detare të hedhura nga ajri kishin për qëllim të prishnin transportin e furnizimeve ushtarake përgjatë lumit./ a.jor.