Specialja, Kuvendi i Kosovës voton të hënën

Kryesia e Kuvendit të Kosovës vendosi që të hënën në ora 10 të mbahet seanca plenare për votimin e Gjykatës Speciale.

Me propozim të qeverisë është vendosur që Kuvendi të votojë për herë të dytë amendamentin kushtetues, që më herët gjatë ditës u riprocedua nga qeveria.

Përfaqësuesit e opozitës insistuan që kjo pikë të mos rikthehej në seancë pasi ka dështuar njëherë të marrë 80 votat e nevojshme, por kryetari i Kuvendit sqaroi se kushtetuta dhe rregullorja e Kuvendit nuk e ndalojnë riprocedimin e një dokumenti të caktuar.

Opozita kërkoi nga Kryesia që në seancën e së hënës, para se të vendoset për Gjykatën Speciale të miratohet rezoluta për dënimin e krimeve të kryera nga Serbia në Kosovë.

Përfaqësuesit e pozitës thanë se nuk mundet që një rezolutë e tillë të kalojë në seancë pa i kaluar procedurat normale parlamentare.