Stoltenberg në vizitë të papritur në Afganistan

 Sekretari i përgjithshëm i NATO-s, Jens Stoltenberg mbërriti sot në mëngjes në Afganistan, në një vizitë të papritur për të takuar trupat e huaja atje si edhe liderët e rinj të vendit, njoftoi aleanca ushtarake më e fuqishme e botës.

Pritet që Stoltenberg të takohet me presidentin e ri të vendit, Ashraf Ghani dhe shefin e ekzekutivit, Abdullah Abdullah.

“Për më tepër se një vit, ushtarët dhe policët afganë kanë drejtuar operacionet e sigurisë në të gjithë vendin dhe në fund të vitit ju do të merrni përsipër sigurinë e vendit. Ju nuk do të jeni vetëm. NATO-ja dhe partnerët e saj do të vazhdojnë t’ju mbështesin”, thuhet në deklaratën që Stoltenberg do të lexojë përpara trupave afgane.

NATO dhe SHBA do të tërheqin trupat deri në fund të këtij viti, pas 13 vitesh luftë me rebelët talebanë.