Suedia 70 milionë euro, në kuadër të marrëveshjes së bashkëpunimit me Kosovën
Ministri i Integrimit Evropian, Bekim Çollaku nënshkroi sot një marrëveshje bashkëpunimi me vlerë 70 milionë euro mes Republikës së Kosovës dhe Suedisë.
Kjo marrëveshje synon ngritjen e bashkëpunimit mes dy vendeve sa i përket programeve të ofruara nga Suedia, si pjesë e asistencës së saj për Kosovën.
Ministri i Integrimit Evropian, Bekim Çollaku, tha se bazuar në këtë do të nënshkruhen marrëveshje të tjera me institucionet e linjës, për zbatimin e projekteve në sektorët e ndryshëm.
Pala suedeze është përfaqësuar në këtë marrëveshje nga Agjencia Suedeze për Zhvillim dhe Bashkëpunimit Ndërkombëtar (SIDA), ndërsa është nënshkruar prej shefit të Misionit në Ambasadën e Suedisë në Kosovë, Henrik Nilsson.
Gjatë ceremonisë së nënshkrimit ministri Çollaku theksoi se, “fokusi i marrëveshjes do të jetë në integrimin ekonomik me BE-në dhe zhvillimin e një ekonomie funksionale të tregut, në fuqizimin e demokracisë, respektimin më të madh të të drejtave të njeriut, në sundimin e ligjit, në një mjedis më të mirë dhe qëndrueshmëri më të lartë ndaj ndikimit në mjedis dhe ndryshimeve klimatike”.
Kjo marrëveshja kornizë identifikon sektorët kyç në të cilët do të fokusohet asistenca zhvillimore e Suedisë në Kosovë për periudhën kohore 2014-2020.
