Sulmohet me mortaja ambasada ruse në Damask, Rusia: Vepër e SHBA-së
Ministria e Punëve të Jashtme të Rusisë ka lëshuar një deklaratë ku informon se Ambasada ruse në Damask ka pësuar një sulm me mortajë më 3 tetor, raporton TASS.
Sipas deklaratës, asnjë nga punonjësit e delegacionit diplomatik nuk është plagosur. Raporti vë në dukje se një nga raketat goditi një zonë të populluar brenda ambasadës.
“Rastësisht asnjë prej punonjësve nuk u plagos në këtë incident”, thuhet në deklaratën e ministrisë. Dy predha të tjera shpërthyen pranë ambasadës duke shkaktuar dëme materiale.
“E shohim këtë sulm ndaj Ambasadës ruse në Damask, si pasojë e veprimeve të vendeve si SHBA dhe disa prej aleatëve të saj, të cilët duke u pajtuar me grupe të caktuara ekstremiste provokojnë vazhdimësinë e konfliktit të përgjakshëm në Siri”, vijon deklarata e Ministrisë.
Moska është e bindur se në përgjigje të veprimeve kriminale “duhet të forcohen veprimet e koordinuara nga bashkësia ndërkombëtare”.
“Nga ana jonë, do të merren të gjitha masat e nevojshme për të eliminuar kërcënimin terrorist dhe kthimin e paqes në territorin sirian”, thuhet në deklaratën ministrore.
