Deputetja e Partisë Demokratike, Jorida Tabaku reagoi sot për situatën ekonomike në vend, ndërsa shtoi se “qeveria kujdeset që përditë të na tregojë që Shqipëria ka një rritje ekonomike fenomenale”.
Tabaku theksoi se “kushdo nga qytetarët e di që shqiptarët po largohen nga vendi, që është një krizë thuajse permanente për punëtorë por qeveria thotë që nuk janë larguar mbi 200 mijë shqiptarë pasi në fakt qeveria ka rritur punësimin dhe shqiptarët që mungojnë janë thjesht të punësuar”.
Sipas saj, “kredimarrësit e dinë që kësti i kredisë së marrë në bankë është duke u rritur përditë, por qeveria na thotë që në fakt borxhi ynë publik është në vlera minimale”.
“Kushdo e di që inflacioni po ia gllabëron rrogën, qiranë dhe të ardhurat por qeveria kujdeset të na thotë që rritja ekonomike është shumë e mirë. Kushdo e di që taksat e kësaj qeverie janë ushqimi me të cilën ushqehet oligarkia politike dhe ekonomike që merr projekte publike dhe shqiptarët paguajnë dy herë, por qeveria çdo dy ditë del dhe tregon përrallën se Shqipëria është parajsa e turistëve dhe vendi më i drejtë fiskal”, shtoi ajo.
Po ashtu, Tabaku theksoi se kushdo e di se arsyeja e zhvlerësimit të euros nuk është prej turizmit, por nga paratë e pista dhe zgjedhjet.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.