Tendera fiktivë, shkon në gjykatë dosja për 6 zyrtarë e Komunës Tropojë e Vjetër e 2 të tjerë

Prokuroria e Tropojës ka dërguar për gjykim 8 persona ndër të 6 janë zyrtarë lokalë, përfshirë edhe kryetarin e komunës Tropojë e Vjetër, si edhe 2 të tjerë që janë përfaqësues të një subjekti privat, të akuzuar për veprat penale të “shpërdorimit të detyrës”, kryer në bashkëpunim dhe ”Falsifikim të dokumenteve” në bashkëpunim.

Burimet zyrtare thonë se në përfundim të hetimeve, Prokuroria ka marrë të pandehur kreun e Komunës Tropojë e Vjetër, Ram Kërtoçin, Haki Nezajn, Nënkryetar, i komunës, Man Malajn, me detyrë shef i Financës, Zeqir Hykajn, teknik Ndërtimi, Resmi Mulajn, sekretar, Fitim Pecin, punonjës në sektorin e pyjeve dhe Sami Isufin, Administrator i firmës së ndërtimit “B…”, e Ukë Kortoçi, punonjës i të njëjtit subjekt.

Fillimisht, ndaj këtyre personave, hetimi është zhvilluar nën masën e sigurisë “arrest në burg”, të cilat janë ekzekutuar në mars të vitit 2014. Më pas, gjykata vendosi të zbusë masat e sigurisë dhe hetimi i prokurorisë ndaj këtyre personave ka vijuar me masat “garanci pasurore” apo në gjendje të lirë.

Nga hetimet e prokurorisë, ka rezultuar se zyrtarët lokalë, kanë kryer pagesat e plota për llogari të shoqërisë “B…”, duke i konsideruar 6 punime infrastrukturore të përfunduara, ndërkohë që nga verifikimi në terren rezulton se këto punime nuk kanë filluar ose nuk kanë përfunduar. Pagesat për shoqërinë “B…”, e cila ka fituar tenderin për këto punime, janë kryer duke falsifikuar dokumentet dhe me shpërdorim detyre.