Testimi i dytë për mësuesit, Nikolla: Rëndësi që të jenë brenda profilit

Janë plot 3900 kandidatë për mësues të cilët i janë nënshtruar testimit të dytë mësues për Shqipërinë.

Ministria e Arsimit Lindita Nikolla tha se është shumë e rëndësishme që në sistemin arsimor të kemi mësues brenda profilit dhe jashtë politikës.

“Sot në Shqipëri 3900 mësues që plotësojnë të gjitha kriteret ligjore kanë shansin të jenë pjesë e një sistemi të ri punësimi në arsim si një përgjigje e hapur në luftën ndaj ndërhyrjeve të politikës në punësimin e mësuesve, po sigurisht dhe një përgjigje e hapur ndaj korrupsionit”, tha ministrja Nikolla.

Testimi është zhvilluar në të gjithë vendin. Vetëm në Tiranë kanë konkurruar 600 persona, të cilët do të rankohen në bazë të pikëve që do të marrin në këtë test, dhe ku do të kenë shansin për tu punësuar vetëm kandidatët që do të kenë pikët maksimale. Në testimin e parë morën pjesë rreth 5300 kandidatë nga ku u punësuan 2700 mësues.