Thaçi: Do ta bëjmë Kosovën një vend me demokraci dhe ekonomi të zhvilluar

Zëvendëskryeministri dhe ministri i Jashtëm i Kosovës, Hashim Thaçi, uroi sot të gjithë qytetarët kosovarë për 8 vjetorin e shpalljes së Pavarësisë së Kosovës.

Në një postim në rrjetin social Facebook, Thaçi shkruan se “akti solemn i shpalljes së Pavarësisë së Kosovës 8 vite më parë është padyshim një ndër arritjet më të madhe historike të kombit tonë. Këto tetë vite të shtetit tonë dëshmojnë se projekti i suksesshëm i Kosovës si shtet sovran e i pavarur, përveçse ishte një domosdoshmëri historike që mundësoi vënien në vend të një padrejtësie shekullore , është edhe një model për gjithë rajonin për sa i përket fqinjësisë së mirë, respektimit të të drejtave të njeriut dhe pakicave si dhe harmonisë fetare”.

Në këtë ditë të shënuar, vijon ai, ne përulemi para atyre qindra dhe mijëra djem e vajzave, burrave e grave, që me përpjekjet e tyre të pareshtura duke mos kursyer as jetën, i sollën lirinë vendit tonë.

Më tej, Thaçi shpreh mirënjohjen ndaj Shtetet e Bashkuara të Amerikës dhe aleatëve të tjerë.

“Atyre sot u themi se tek Kosova do të gjejnë gjithmonë një partner të besueshëm, që është renditur pa asnjë mëdyshje në anën e drejtë të historisë, në anën e atyre vendeve që synojnë të promovojnë lirinë, demokracinë dhe paqen”, shprehet Thaçi.

Zv/kryeministri Thaçi thekson se “shteti ynë i ri ka ende shumë sfida të trashëguara e të reja për të përballur, por historia që kemi lënë pas na tregon se kemi kapërcyer vështirësi edhe më të mëdha se këto, prandaj jam i bindur se të bashkuar ne do ia dalim që ta bëjmë Kosovën një vend me demokraci dhe ekonomi të zhvilluar, anëtare të denjë të komunitetit Euro-Atlantik”.

“Miq të dashur kjo është toka jonë e lirë, ky është shteti ynë i pavarur, këto janë institucionet tona demorkatike , jemi ne ata që duhet t’i dalim zot shtëpisë sonë!”, përfundon Thaçi.