Thaçi: Kosova do ta marrë përsipër borxhin ndaj Japonisë

Zëvendëskryeministri, njëherësh ministër i Punëve të Jashtme të Kosovës, Hashim Thaçi, ka pritur në një takim pune ambasadorin e Jashtëzakonshëm dhe të Plotfuqishëm të Japonisë në Austri, Kosovë dhe Maqedoni, Makoto Taketoshi, me të cilin diskutoi për mënyrat e thellimit të bashkëpunimit të mirë mes dy vendeve.

Thaçi e falënderoi ambasadorin Taketoshi për përkrahjen që Japonia i ka dhënë Kosovës që nga shpallja e pavarësisë, si në rrafshin politik ashtu edhe në atë ekonomik dhe kulturor.

“Duke treguar për të arriturat në procesin e dialogut mes Kosovës dhe Serbisë, Zëvendëskryeministri Thaçi tregoi se pjesë e dialogut do të jetë edhe çështja e borxhit ndaj Japonisë dhe se Kosova do të marrë mbi vete pagesën e pjesës së vet të borxhit që kjo çështje të mos bëhet pengesë në marrëdhëniet mes dy vendeve”, thuhet në komunikatë.

Zëvendëskryeministri Thaçi shtoi se Kosova mund të mësojë shumë nga përvoja e Japonisë në zhvillimin e vendit pas luftës dhe ftoi që të thellohet ky bashkëpunim mes vendeve.

Ambasadori japonez Taketoshi falënderoi njoftoi për projektet që shteti i Japonisë ka me Kosovën.
Ambasadori Taketoshi njoftoi për projektet për asistencë teknike në Pejë dhe Istog si dhe për projektet me Ministrinë e Arsimit për të financuar shkollimin e plotë të një studenti nga Kosova, çdo vit, në universitetet e Japonisë.