Thaçi në Tiranë, në samitin e vendeve të Evropës Juglindore
Në kuadër të Presidencës Shqiptare të Procesit të Bashkëpunimit të Vendeve të Evropës Juglindore (SEECP), të hënën dhe të martën në Tiranë mbahet takimi i ministrave të Punëve të Jashtme të vendeve pjesëmarrëse.
Kosova në këtë konferencë, që është më e rëndësishmja në rajon, po përfaqësohet nga zëvendëskryeministri i parë, njëherësh ministër i Punëve të Jashtme, Hashim Thaçi.
Përveç zëvendëskryeministrit Thaçi, pjesëmarrjen e kanë konfirmuar edhe pesë zëvendëskryeministra e ministra të rajonit dhe nëntë sekretarë të shteteve e zëvendësministra të tjerë.
Pjesëmarrjen e ka konfirmuar Igor Lukshiq, zëvendëskryeministër, njëherësh ministër i Jashtëm i Malit të Zi, ministri i Jashtëm i Maqedonisë, Nikolla Poposki, pastaj, ministri për Rini dhe Sport i Turqisë, Akif Cagatay Kiliç, ministri për Çështje Evropiane i Greqisë, Nikolaos Chountis, zëvendësministri i Punëve të Jashtme dhe Integrimeve Evropiane i Moldavisë, Lulian Groza, etj.
Konferencës së SEECP-së, që kryesohet nga ministri i Jashtëm i Shqipërisë, Ditmir Bushati, do t’i drejtohet me një fjalim edhe kryeministri i Shqipërisë, Edi Rama.
Ndërkaq, në takimin e nesërm, ku ministrat e disa prej shteteve të Evropës Juglindore do të diskutojnë rreth fuqizimit të bashkëpunimit ndërshtetëror, pjesëmarrës do të jenë edhe zyrtarë të lartë të BE-së, përfaqësues të Presidencës Letoneze të BE-së dhe të Këshillit të Bashkëpunimit Rajonal (RCC).
