Thaçi “nis ofenzivën”, takon grupin “6+”

Kryeministri i Kosovës, Hashim Thaçi, njëherit edhe lideri i Partisë Demokratike të Kosovës, Hashim Thaçi ka bërë të ditur se sot ka takuar grupin politik paszgjedhor “6+”.

Thaçi ka thënë se me grupin “6+” është biseduar për hapat e mëtutjeshëm për ndërtimin e institucioneve të reja të dala nga zgjedhjet e 8 qershorit.

Lexojeni të plotë postimin e Thaçit në Facebook:

Sot takova grupin politik paszgjedhor “6+” dhe biseduam për hapat e mëtutjeshëm për ndërtimin e institucioneve të reja të dala nga zgjedhjet e 8 qershorit.

Ishte konkludim i përbashkët se aktgjykimi i Gjykatës Kushtetuese është i qartë dhe se i njëjti duhet të respektohet nga të gjitha palët politike.

U dakorduam që të punojmë bashkërisht si partnerë të koalicionit aktual për tejkalimin e ngërçit politik dhe institucional.

T’i bashkojmë forcat për konstituimin e Kuvendit dhe për formimin e qeverisë së re ku grupi politik “6+” do të ketë vendin meritor.

Përkushtim i imi mbetet ndërtimi i institucioneve me një bazë sa më të gjerë politike.