Topalli kundër Bashës: Bojkoti i zgjedhjeve, vetëvrasje për PD
Ish-nënkryetarja e Partisë Demokratike Jozefina Topalli, deklaron se bojkoti i zgjedhjeve nuk është opsion për opozitën.
Nga çadra e vendosur para Kryeministrisë, Topalli iu kundërpërgjigjet atyre qe brenda PD apo në media, kanë mbrojtur idenë që opozita të mos marrë pjesë në zgjedhjet parlamentare, duke vënë në dukje se kjo do të ishte vetëvrasje per Partine Demokratike, një pozicion që Topalli e ka mbrojtur edhe në mbledhjet e grupit parlamentar sa herë është ngritur kjo çështje.
“Këtu pastaj është vija ndarëse se unë e gjykoj se do ishte një “suicid” politik e do të ishte një tradhti ndaj të gjithë këtyre që janë këtu dhe ndaj gjithë familjeve të tyre dhe të tjerët që mendojnë se një herë në 4 vjet, vjen mundësia për të shprehur vullnetin e tyre për të ndryshuar situatën. Dhe në këtë kuptim, unë besoj se nëse ne do të ecim në sintoni me dhimbjen dhe dëshirën e madhe të qytetarëve shqiptarë për të ndryshuar gjëra, ne do ta arrijmë pavarësisht kushteve jashtëzakonisht të vështira për të arritur në zgjedhje”, tha Topalli për Vizion Plus.
Por Topalli mbështet bojkotin e parlamentit, edhe pse faktori ndërkombëtar i ka bere thirrje PD të kthehet në Kuvend.
“Është krejt normale që ndërkombëtarët të mos jenë idhtarë të bojkotit, edhe unë personalisht si ish-kryetare e kuvendit, nuk është se kam ndonjë qejf të madh kur bojkotohet Parlamenti, por situata e imponon dhe në këtë kuptim unë respektoj vendimin e grupit”.
Ish-numri dy i PD mbetet një prej atyre demokrateve qe besojnë se opozita nuk duhet t’i mbaje sytë tek Ilir Meta: “S’kam qenë asnjëherë në grupin e atyre që mendojnë se nga cic micet e kryetarëve të partive mund të ndryshojë situata, unë besoj tek forca e fuqia e njerëzve, të atyre që vijnë këtu”.
Sipas Topallit, lidershipit të PD i lind detyrimi që në këtë fazë ta përshkallëzojë protestën.
“Unë besoj se kjo protestë duhet zgjeruar, duhet thelluar, duhet përhapur dhe në fakt është një domosdoshmëri. Nëqoftëse në protestën e mëparshme ishin qytetarët që na prinë ne, kësaj radhe duhet të jeta politika, opozita që ti prijë protestës dhe qytetarëve në mënyrë që shikimin e tyre të humbur dhe të pashpresë ta kthejmë në një rreze drite për ta, për fëmijët e tyre e për familjet e tyre”.
