Transferimet e Skukës, Xhixhës dhe Simonit, Duka: Konfirmim i rritjes së kampionatit
Presidenti i Federatës Shqiptare të Futbollit, Armand Duka përshëndeti sot transferimet e rëndësishme e tre prej lojtarëve më cilësor të kampionatit shqiptar të futbollit.
Duka u shpreh se, “Simon Simoni, Xhuliano Skuka dhe Redon Xhixha janë produkte bio të kampionatit tonë, akademive e klubeve që kanë punuar seriozisht me futbollin e moshave”.
“Gjithmonë kam inkurajuar dhe do të mbështes ato klube e akademi që bëjnë një punë të madhe me elementin e ri”, theksoi ai.
Duka nënvizoi se, “Simoni, Skuka dhe Xhixha janë në të njëjtën kohë dhe konfirmimi i rritjes së vazhdueshme të kampionatit, cilësisë së tij dhe tregojnë se produkti jonë ka vlera e mund të konkurrojë denjësisht në arenën ndërkombëtare”.
“Ky është një shembull konkret se me pak më shumë punë e kujdes në menaxhim mund të kemi më shumë raste të tilla suksesi”, tha Duka.
Sulmuesi Redon Xhixha është larguar nga Tirana, pasi do t’i bashkohet klubit të Karabak në Azerbajxhan.
Portieri i Dinamos, Simon Simoni u largua drejt Eintraht Frankfurt në Gjermani.
Ndërsa sulmuesi i Partizanit, Xhuljano Skuka u transferua tek ekipi francez i Metz.
