Turistë britanikë me kroçera në portin e Durrësit

Në portin e Durrësit mbërriti të enjten rreth orës 07.30 kroçera “Thomson Majesty” me 1491 turistë nga 13 vende të botës. Pjesa më e madhe e tyre vijnë nga Britania e Madhe. Kroçera lundroi nga Dubrovniku (Kroaci) drejt Durrësit, ndërsa në mbrëmje do të vazhdojë udhëtimin drejt Korfuzit (Greqi).

Nga burimet e agjencisë pritëse Intermed Shiping mësohet kroçera që vjen për herë të katërt që nga fillimi i këtij viti, ka sjellë 1491 turistë gjithsej. 1462 prej tyre janë britanikë, ndërsa nuk mungojnë edhe turistë nga vende të tjera si, Irlanda, Kina, Italia, Kroacia, Greqia, Sllovakia, SHBA, Kenia, Qipro apo India. Edhe në lundrimet e tjera kjo kroçerë ka sjellë  në Durrës më shumë se 4500 udhëtarë britanikë gjithsej.

Menjëherë pas zbritjes në portin më të madh të vendit, rreth 300 turistë të huaj u nisën me autobuzë drejt qyteteve të Tiranës, Krujës dhe Beratit, në ture të shkurtëra historike, arkeologjike dhe kulturore, ndërsa pjesa më e madhe kanë preferuar të vizitojnë Durrësin dhe rrethinat e tij.

 Kroçera “Thomson Majesty” me gjatësi 207 metra dhe gjërësi 28 metra arrin shpejtësinë 18 milje/orë.  Pas dy javësh në portin më të madh të vendit pritet edhe një kroçerë tjetër.