U arratis nga burgu grek, 5 vjet burg në Shqipëri për Ilir Kupën
Gjykata e Tiranës ka dënuar me 5 vjet e 4 muaj burg shqiptarin e arratisur nga burgu grek Ilir Kupa, i cili u arrestua në Shqipëri për akuzën e armëmbajtjes pa leje.
Para se të mësonte vendimin gjykatës, Ilir Kupa tregoi në sallën e gjyqit se armët i mbante nga frika se do e qëllonte policia greke dhe kërkoi të lirohej: “Dua të qëndroj pranë familjes sime dhe fëmijëve të mi”. Kupa po ashtu akuzoi shtetin grek se i mban të burgosur pa të drejtë vëllanë dhe atin e tij.
Ilir Kupa u arratis nga burgu i Trikalasë së bashku me një grup shqiptarësh në mars të 2013-ës. Kreu i grupit shqiptar të arratisur, Marjan Kola u vra më 21 korrik 2013 pranë fshatit Vrosina të Sulit dhe me të ka qenë dhe Ilir Kupa. Ky i fundit u arrestua mëngjesin e 25 janarit 2014 në afërsi të Kasharit.
