UEFA, gjobë FSHF-së për flakadanët
UEFA ka gjobitur Federatën Shqiptare të Futbollit, kjo për shkak të incidenteve të ndodhura gjatë ndeshjes Shqipëri – Moldavi e vlefshme për kualifikueset e Kampionatit Europian “Gjermani 2024”.
21.250 euro është masa e gjobës e vendosur nga Komisioni i Etikës dhe Disiplinës në UEFA, ndërsa problematikat, sipas njoftimit për shtyp të Federatës Shqiptare të Futbollit, kanë ardhur nga grupimi “Tirona Fanatics”, të cilët ndezën flakadanë gjatë ndeshjes, duke shkaktuar kështu trazira dhe situata krejtësisht të evitueshme.
Federata Shqiptare e Futbollit gjen rastin t’u bëjë apel të gjitha grupimeve dhe tifozëve shqiptarë që të jenë më të përgjegjshëm dhe të shmangin krijimin e incidenteve që mund të sjellin penalitete financiare dhe jo vetëm për Kombëtaren dhe futbollin shqiptar. “Njëkohësisht, i ftojmë të gjithë tifozët dhe futbolldashësit të mbështesin Kombëtaren, duke treguar qytetari dhe përgjegjshmëri përmes një sjellje korrekte e duke respektuar rregullat dhe kundërshtarët”, thuhet në komunikatën për shtyp të Federatës Shqiptare të Futbollit.
