Ulet interesi, por depozitat në euro shënojnë rritje

Nga 1 marsi i këtij viti, Banka e Shqipërisë e uli interesin për tepricat në euro që bankat tregtare mbajnë në llogaritë e Bankës Qendrore, poshtë interesit të aplikuar nga Banka Qendrore Europiane 0.1%, me qëllim rritjen e investimeve në ekonomi.

Por, megjithëse bankat gradualisht kanë ulur pranë zeros interesat e depozitave në euro, sërish vitin e kaluar totali i depozitave në valutë u rrit me 4.5%.

Sipas të dhënave nga Banka e Shqipërisë, në fund të vitit 2015, kredia në valutë pësoi rënie me më shumë se 20 miliardë lekë ose 6.2% krahasuar me një vit më parë. Megjithëse ky rezultat është i ndikuar nga fshirja e kredive të humbura, sërish kreditimi në valutë ka një ecuri dukshëm negative, edhe po ta krahasojmë me kreditimin në lekë, që vitin e kaluar u rrit me 3%.

BSH-ja bën të ditur se, bankat kanë preferuar që investimet në euro t’i fokusojnë jashtë vendit, megjithëse edhe për këtë Banka e Shqipërisë është përpjekur ta frenojë, duke rritur koeficientët e ponderimit të aseteve për llogaritjen e mjaftueshmërisë së kapitalit.