Ulqin, arrestohet një person i dyshuar për zjarrvënien

Prokuroria themelore e shtetit në Ulqin ka caktuar masën e paraburgimit për një person, i cili dyshohet se ka shkaktuar zjarrin në Malin e Bardhë.

Jozyrtarisht është arrestuar Arif Osmani nga Prishtina, raporton televizioni shtetëror i Malit të Zi (RTCG). Osmani pas një grindjeje mori një fanellë me zjarr dhe e hodhi atë në pyllin e afërt me pisha. Mediat malazeze në mesditë raportuan se zjarri ka vazhduar të përhapet drejt Valdanos.

Nga shërbimi i Mbrojtjes dhe Shpëtimit të Ulqinit njoftuan se për shuarjen e zjarrit që shpërtheu të shtunën në Ulqin është përfshirë edhe avioni për shuarjen e zjarreve nga Podgorica, ndërsa ndihma mund të mbërrijë edhe nga Serbia fqinje.

Ekipet zjarrfikëse nga Ulqini, Tivari, Podgorica, Budva dhe Cetinja gjatë natës ishin aktive në terren dhe luftuan me stuhitë e zjarrit. Shuarja e zjarrit pengohet nga terreni i paarritshëm, ndërsa si prioritet është caktuar parandalimi i përhapjes së saj në zonat e banuara. Nga zjarri nuk kishte të plagosur.