Valë tjetër arrestimesh ndaj policëve të dyshuar për përgjime të paligjshme

Rreth 34 policë u arrestuan sot nga autoritetet turke në kuadër të çështjes së përgjimeve të paligjshme të zyrtarëve të lartë të shtetit duke përfshirë dhe presidentin, Recep Tayyip Erdogan, njoftoi sot agjencia zyrtare turke e lajmeve Anadolu Agency.

Të dyshuarit, ndaluar në tetë qytete në mbarë vendin, akuzohen për regjistrim të paligjshëm të bisedave telefonike të biznesmenëve, politikanëve dhe anëtarëve të qeverisë, njoftoi Anadolli.

Ata akuzohen gjithashtu për fshehje të dokumenteve zyrtare dhe shkelje të jetës private.

Ky aksion është i fundit nga një sërë arrestimesh të kryera që prej muajit korrik, gjatë të cilave dhjetëra policë të tjerë janë ndaluar.

Procesi i parë gjyqësor ndaj 13 të dyshuarve të akuzuar për vendosjen e mikrofonëve në zyrat e presidentit aktual nisi të premten.