Varshava kritikon KE-në, por përjashton një “Polexit”

Kryeministrja polake, Beata Szydlo përjashtoi sot një “Polexit”, dalja e vendit nga Bashkimi Evropian duke hedhur poshtë akuzat për populizëm dhe duke kritikuar rolin abuziv të Komisionit Evropian, sipas saj.

Ajo kërkoi për vendin e saj dhe për fqinjët e Evropës Qendrore një rol më të rëndësishëm në përcaktimin e politikave evropiane.

“Polonia i përket BE-së dhe BE-ja i përket Polonisë”, theksoi Szydlo në Varshavë.

Ajo shprehu keqardhje për faktin se po kërkohet të bindin opinionin publik se Polonia është antievropiane.

Disa çështja, si ajo e shtetit të së drejtës në Poloni, janë bërë objekt tensionesh mes Komisionit dhe konservatorëve nacionalistë të ardhur në pushtet në Varshavë dy vjet më parë.

Duke folur gjatë një forumi mbi politikën e jashtme, Szydlo dënoi konceptin e Evropës me disa shpejtësi duke konfirmuar se e ardhmja e Bashkimit Evropian duhet të bëhet objekt i një debati mes gjithë vendeve anëtare dhe jo brenda një rrethi prej tre apo katër kryeqytetesh.

Duke kërkuar një reflektim mbi origjinën e riforcimit të tendencave euroskeptike në disa vende anëtare të BE-së, kryeministrja shprehu keqardhje që disa dhjetëra milionë evropianë nga vende të ndryshme ishin cilësuar si populistë, të pamatur dhe të rrezikshëm, që Polonia ishte përballur me kritika sepse ka kurajon për të folur me zë të lartë dhe qartë.