Rama për AP: “Zvërneci”, kundërshtimet nga keqinformimi

Kryeministri Edi Rama u shpreh i vendosur në një intervistë për Associated Press, për të çuar përpara projektin e resortit luksoz të Jared Kushnerit, pavarësisht valës së protestave në vend.

Kundërshtimet që lidhen me mjedisin, Rama thotë se vijojnë për shkak të keqinformimit, ndërsa sqaron se vlerësimet për ndikimet që projekti do të ketë në mjedis ende nuk kanë nisur.

Protestat kundër projektit kanë mbushur 10 ditë, megjithatë kur pyetet nga agjencia prestigjoze për t’u tërhequr nga plani, le të kuptohet se nuk ka ndërmend.

Kryeministri mbrojti arritjet e qeverisjes së tij në ruajtjen e natyrës, duke përmendur se moratoriumi 10-vjeçar i gjuetisë ndihmoi në rikthimin e faunës dhe shtimin e popullatës së flamingove. I pyetur për hetimet e hapura nga SPAK mbi pretendimet e pronësisë së tokës dhe për reagimet e ashpra të opinionit publik, Rama la të kuptohet se reagimet po nxiten nga jashtë si pasojë e fushatës së sulmeve kibernetike nga Irani.

Rama rrëfeu se ideja për rezortin luksoz të Zvërnecit lindi rastësisht në një darkë me Xhared Kushnerin dhe Ivanka Trumpin në jug të Shqipërisë. Çifti ndodhej në vendin tonë, për të furnizmuar me karburant jahtin, rrugës për në Malin e Zi dhe se pas kësaj vizite Kushner i shprehu dëshirën për të investuar në Shqipëri.

Kreu i qeverisë tha se ky zhvillim po e kthen Shqipërinë nga një vend dikur të injoruar nga investitorët në shumë të dëshiruar, si nga investitorët e mëdhenj ashtu edhe nga kapitali i madh.

Tv Klan

/tvklan.al