Veliaj: Korrupsioni në gjykata ka bllokuar 40 projekte të bashkisë

Korrupsioni në gjykata ka bllokuar 40 projekte të bashkisë së Tiranës, prandaj vettingu është i domosdoshëm. Ka qënë kjo deklarata e kryebashkiakut Erion Veliaj. Ai ka inspektuar përfundimin e punimeve në një zonë periferike të Tiranës, e cila ishte kthyer në shqetësim për banorët e zonës.

“Kemi hapur rreth 100 kantiere pune, nga të cilat 40 bllokohen përkohësisht me vendime gjykatash, që marrin masa bllokimi për punët e bashkisë. Sot mjafton që një i fortë të bëjë një pagesë në një gjykatë të shkallës së parë, të marrë një masë bllokimi dhe 40% e kantiereve të Tiranës bllokohen”, tha kreu i bashkisë.

Një nga zonat periferike të Tiranës, fshati Sos në Njësinë Administrative Nr. 2, tashmë është bërë pjesë e qytetit edhe si infrastrukturë rrugore e urbane. Bashkia e Tiranës ka përfunduar në kohë rekord ndërtimin e rrugës “Hermann Gmeiner”, e cila qe kthyer në një shqetësim disa vjeçar për banorët e lagjes së populluar pas viteve ‘90. I shoqëruar nga deputeti i PS, Besnik Bare, dhe Administratori i Njësisë Nr. 2, Elez Gjoza, kryetari i Bashkisë së Tiranës, Erion Veliaj, theksoi se ky investim është një tjetër dëshmi e reduktimit të diferencave mes qendrës dhe periferisë.

Rruga “Hermann Gmeiner” në fshatin SOS do i shërbejë jo vetëm banorëve të lagjes, por dhe institucioneve të tjera sociale dhe shtetërore.

“Kjo është zona e Saukut, një zonë e cila ka ndërtesa rezidenciale, por edhe shumë ndërtesa sociale e arsimore. Ka shkolla, kopshte, çerdhe, këtu është edhe shkolla e re “Hermann Gmeiner”, që mban emrin e rrugës, ka edhe shumë institucione të tjera private ose publike. Ndaj, qindra dhe mijëra qytetarë që banojnë ose punojnë këtu, duke nisur që nga rezidenca e Presidentit, nga sot kanë një hyrje alternative, jo mes përmes parkut të Liqenit”, shtoi Veliaj.