Vetëm katër marrëveshje të Brukselit u implementuan plotësisht

Marrëveshjet e arritura në Bruksel në dialogun e zhvilluar mes Kosovës dhe Serbisë, vazhdojnë të mos implementohen.

Sipas një raporti të Big Deal, një iniciativë e mbikëqyrjes qytetare të procesit të negociatave Kosovë-Serbi, thuhet se vetëm 4 nga 16 marrëveshjet e arritura në Bruksel, që nga vitit 2011, në mes të Prishtinës dhe Beogradit, janë implementuar plotësisht.

Raporti u bën thirrje të dyja palëve si dhe Bashkimin Evropian që t’i japin prioritet procesit, duke qenë se shumë nga marrëveshjet e arritura në mes të dy palëve akoma nuk janë implementuar plotësisht.

“Është për të ardhur keq që vetëm 25% e marrëveshjeve të arritura janë implementuar plotësisht, përderisa më shumë se 25 për qind e problemeve janë gjeneruar në katër vitet e fundit, duke përfshirë edhe një barrikadë më të fortë se që ka qenë katër vite më parë, në urën e Mitrovicës”, tha Jeta Xharra, drejtoreshë ekzekutive e BIRN-it në Kosovë.

Raporti është rezultat i më shumë se 70 intervistave me negociatorë, politikanë vendasë, gazetarë dhe qytetarë të zakonshëm, si dhe një hulumtim intensiv prej më shumë se gjashtë muajsh, i realizuar nëpër Kosovë dhe Serbi.

“Mbikëqyrja qytetare është një prej vlerave kyçe të demokracisë. Prandaj, suksesi i këtij procesi është i kushtëzuar nga mbikëqyrja dhe pjesëmarrja aktive qytetare”, tha Vukosava Crnjanski, drejtoreshë e CRTA.

Raporti i parë i Big Deal analizon dinamikat e implementimit, të cilat janë penguar në mënyrë serioze nga ngërçi politik në Kosovë, vendimet e Gjykatës Kushtetuese Serbe dhe krizat që e kanë zhvendosur vëmendjen e Bashkimit Evropian.

Një vit e gjysmë prej kur u arrit marrëveshja e shumë përfolur në Bruksel në 19 prill 2013, e cila trajtoi më shumë se si Kosova do t’i inkuadrojë katër komunat e Veriut, progresi në çështjet kyçe ka ngecur.

Në mënyrë të veçantë, formimi i komunave me shumicë serbe, dhe strukturat gjyqësore dhe të sigurisë kanë akoma shumë për të bërë.

Big Deal është mbështetur nga Zyra e Jashtme Britanike dhe e Commonwealth dhe Fondi Rockefeller Brothers.

Big Deal do të publikojë raporte çdo gjashtë muaj.

Raporti “Monotonia e qytetëruar”, është prodhuar nga BIRN Kosova, Qendra për Transparencë, Hulumtime dhe Llogaridhënie – CRTA nga Serbia dhe Internews Kosova.