Vizita problematike, Trump në Britani në 2018-ën
Presidenti amerikan Donald Trump mund të vizitojë Britaninë e Madhe vitin e ardhshëm. BBC, bazuar në burimet e saj, shkruan se Downing Street dhe Shtëpia e Bardhë po konsiderojnë opsionet për këtë vizitë.
Trump pranoi ftesën e Mbretëreshës për të vizituar ishullin britanik në janar, gjatë vizitës së kryeministres Theresa May në Uashington.
Por mundësia e zhvillimit të kësaj vizite shkaktoi shumë polemika në Britani dhe bëri që Trump të ndryshonte mendjen, ose kështu të paktën raportojnë mediat.
Sipas shtypit amerikan, ai tha se nuk dëshironte të vizitonte Anglinë ndërsa ekziston mundësia e protestave kundër tij.
Kjo ishte një mundësi reale, pasi thuajse 2 milion njerëz firmosën peticione që Trump nuk duhej ftuar në Britani për një vizitë shtetërore.
Kur Mbretëresha Elizabet nuk e përmendi vizitën e Trump në fjalimin e saj të para disa javëve, shtyrja e vizitës u mor si e mirëqenë.
Shtëpia e Bardhë ka mohuar gjithnjë pretendimet se Trump kishte rezerva për vizitën, por tashmë që flitet për zhvillimin e saj vitin e ardhshëm, kjo veçse i ka hapur rrugën spekulimeve të mëtejshme.
