Vjedhja e Thesarit, shtyhet marrja në pyetje Çollakut, dyshohet se paratë janë transferuar jashtë

Është shtyrë për nesër marrja në pyetje nga prokuroria për Dorian Çollakun, ish-drejtor i Departamentit të Thesarit në Bankën e Shqipërisë.

Çollaku ndodhet në qelitë e paraburgimit të burgut 313 ku u vetëdorëzua pas lëshimit të një urdhër arresti ndaj tij i akuzuar si i përfshirë në vjedhjen spektakolare të 713 mln lekëve nga Banka e Shqipërisë.

Shkak i shtyrës së seancës pyetësore është bërë kërkesa e familjarëve të Çollakut për të ndërruar avokatin mbrojtës, ndërkohë që 8 nga 10 të arrestuarit për këtë ngjarje kanë apeluar vendimin dhe pritet të dalin në Apel më 26 gusht, veç Ardian Bitrajt dhe Mimoza Bruzias.

Hetimet e prokurorisë mendohet se do të përqendrohen në udhëtimet e shpeshta jashtë vendit të Çollakut, pasi ka dyshime se paratë mund të jenë transferuar jashtë. Sipas sistemit TIMS, rezulton se Çollaku ka kryer 34 hyrje-dalje në kufi brenda një periudhe shumë të shkurtër, gjë që ai e ka justifikuar me ndjekjen e një studimi master në Athinë.