Vjenezja “Der Standard”: Kosova varet nga direktivat e SHBA-se

Kosova më shumë se pesë muaj pas zgjedhjeve duket se do të bëhet me qeveri të re, ndërsa kjo është e mundur vetëm me përkrahjen dhe direktivat e Shteteve të Bashkuara, vlerëson e përditshmja vjeneze, “Der Standard”.

Ambasadorja e SHBA-ve, Tracey Ann Jacobson, dy javë më parë, me anë të një mesazhi të qartë ju ka drejtuar politikanëve kosovarë edhe atë në gjuhën shqipe, ku publikisht u kishte thënë ‘mos e dh…punën’.

“Standard” shkruan se kjo është një formë e presionit që të arrihet një marrëveshje për koalicion, ndërsa kështu ka ndjek traditën e paraardhësit të tij, Christopher Dell, i cili ka marrë pjesë në të gjitha çështjet e mëdha politike të Kosovës, transmeton Telegrafi.

“Shteti më i ri në Evropë, praktikisht ende varet nga direktivat e Uashingtonit”, shkruan gazeta austriake, transmeton b92.

Në Kosovë, BE-ja ka rol dytësorë, edhe pse kjo organizatë ka investuar shumë para në këtë shtet, thekson “Der Standard”, duke theksuar se imazhi i Bashkimit Evropian kohët e fundit është dëmtuar për shkak të akuzave për korrupsion në EULEX.

Dobësia e BE-së buron nga përçarja rreth shpalljes së pavarësisë në vitin 2008, shton gazeta vjeneze, duke shtuar se deri më tani pesë shtetet anëtare të BE-së, nuk e kanë njohur Kosovën, gjersa nga Serbia në mënyrë indirekte është kërkuar që ta njoh Kosovën.

“Kjo kufizon fuqinë e BE-së për të nxitur transformimet, e cila është tejet e rëndësishme, duke pasur parasysh se partitë zakonisht ndjekin interesat e tyre”, nënvizon “Der Standard”.