Vlorë, arrestohet vrasësi me pagesë

Arrestohet në kohë nga Policia e Vlorës vrasësi me pagesë, i cili kishte planifikuar të kryente krimin e radhës. Sipas burimeve zyrtare ka rënë në pranga Luka Sherifi, i cili në këmbim të 15 mijë eurove ka tentuar të ekzekutojë 53-vjeçarin Lahe Jazaj.

Gjithashtu në pranga kanë rënë Ledion Muho 24 vjeç  e Mesin Alliaj 56 vjeç , banues në fshatin Gjormë të Vlorës.

Sipas policisë të arrestuarit rreth orës 17.25, të pasdites së djeshme u kapën me mjetin tip “Land Rover”, në drejtim të fshatit Lepenicë, të cilët ishin nisur për të vrarë 54-vjeçarin Jazaj, ku ky i fundit në vitin 2003, ka vrarë vëllanë e Mesinit dhe ka kryer dënimin prej 10 vite burg.

Dyshohet se porositësi i vrasjes ka qenë Mersin Alliaj 56 vjeç. Në cilësinë e provës materiale, policia ka sekuestruar armën e krimit, një automatik kallashnikov dhe një krerë me fishek, një çantë në të cilën autori kishte maska, dorashka, ushqime dhe veshmbathje rezervë pasi survejonte prej ditësh banesën e personit që do vriste, ndërsa i është gjetur edhe një skicë e banesës dhe e vendit nga do të largohej personi.

Një vit më parë është tentuar të vritet me të njëjtën skemë djali i shtetasit Lahe Jazaj, Misto Jazaj, 17 vjeç. Ngjarja daton që prej 23 majit 2003, kur Lahe Jazaj ka vrarë shtetasin Bujar Alliaj, vëllanë e porositësit.  Për këtë krim autori u dënua me 17 vjet burg dhe dy vjet më parë përfundoi dënimin. Policia mendon se gjakmarrja ishte planifikuar të ndodhte në prag të përvjetorit vrasjes së vëllait.