VV paralajmëron padi për drejtorin e Shërbimeve Publike në Prizren
Lëvizja Vetëvendosje ka paralajmëruar se do të ngre padi ndaj drejtorit të Drejtorisë së Shërbimeve Publike në Prizren, Hasan Hasanit, i cili sipas tyre ka fyer një asambleiste të Vetëvendosjes.
Sipas Vetëvendosjes, më datën 5 nëntor, asambleistja e Lëvizjes Vetëvendosjes në Kuvendin Komunal të Prizrenit, Drita Millaku, gjersa po kërkonte qasje në dokumente publike është fyer rëndë mbi baza personale nga drejtori i Shërbimeve Publike, Hasan Hasani.
“Duhet të theksojmë se sjellja vulgare e Hasan Hasanit që tejkalon çdo normë të etikës tashmë vërteton parregullsitë e mëdha me këto tregje që operojnë mbi baza të dyshimta, të cilat, sipas të dhënave të Drejtorisë së Financave që i kemi në dispozicion, kanë vite që nuk i kryejnë obligimet e tyre ndaj Komunës së Prizrenit. Rrjedhimisht dëmi i shkaktuar ndaj buxhetit publik tashmë ka kaluar shumën e 204,440 eurove”, thuhet në njoftimin e VV-së.
Sipas VV-së, “ndaj drejtorit të Drejtorisë së Shërbimeve Publike, mbi bazën e dëshmive që i kemi do të ngremë padi për fyerje ndaj asambleistes tonë”.
“Gjithashtu, refuzimi për të dhënë dokumentet në fjalë paraqet shkelje të Ligjit për Qasje në Dokumente Publike, Rregullores për Transparencë dhe Statutit të Kuvendit Komunal të Prizrenit. Rrjedhimisht jemi të detyruar të iniciojmë procedurën për nxjerrjen e dokumenteve në fjalë përmes Avokatit të Popullit, ashtu siç e parasheh ligji në fuqi”, thuhet në një komunikatë të Vetëvendosjes.
Lëvizja Vetëvendosjes në Prizren kërkon nga Komuna e Prizrenit që t’i përmbahet rregullave të transparencës dhe t’i ndërpresë praktikat e kundërligjshme të fshehjes së dokumenteve zyrtare, të distancohet nga sjelljet e Drejtorit Hasan Hasani ndaj qytetarëve të Prizrenit dhe menjëherë të kërkoj falje publike ndaj asambleistes Drita Millaku.
