4 emra në listë për trajnerin e ri të Milanit. Ibrahimovic ka detyrën e vështirë

Pas dështimit për t’u kualifikuar në Champions League, Milan ka vendosur të shkarkojë ditëne djeshme kupolën drejtuese, duke nisur nga Giorgo Furlani, Igli Tare, Geoffrey Moncada dhe natyrisht trajneri Max Allegri.

Pronari i Milan, Gerry Cardinale, i ka lënë këshilltarit të tij, Zlatan Ibrahimovic, detyrën e vështirë për të zgjedhur trajnerin e ri. Gazzetta dello Sport zbulon se aktualisht janë 4 kandidatë për të marrë drejtimin e kuqezinjve.

Emri i parë dhe favoriti kryesor është Xavi Hernandez, i cila ka refuzuar shumë klube pas largimit nga Barcelona, por Milanin do ta ketë të pamundur t’i thotë “jo”. Një pikë e fortë që e shtyn më shumë Xavi-n drejt Milanit është edhe marrëdhënia e tij e shkëlqyer me Ibrahimovic.

Një emër tjetër që nuk duhet nënvlerësuar është edhe Andoni Iraola, i cili sapo mbylli një sezon fantastik me Bournemouth në Premier League, duke i kualifikuar për herë të parë në Europa League.

Lista plotësohet me dy trajnerë që aktualisht janë të “zënë”, Oliver Glasner që drejton Crystal Palace dhe Mauricio Pochettino që momentalisht është i fokusuar në Botëror, pasi drejton SHBA-në. Argjentinasi do të largohet me përfundimin e Botërorit dhe Milan mund të ishte një destinacion perfekt për të.