60 infermierë nga Shqipëria në Itali/ Një valë tjetër solidariteti

Një ekip me 60 infermierë ka mbërritur dje në ndihmë të kolegëve italianë për të përballuar emergjencën e krijuar nga virusi COVID-19.

Ambasada e Shqipërisë në Itali ka theksuar se, “një valë tjetër solidariteti vjen nga brigjet tona në detin e miqësisë dhe ndjenjave që na bashkon!”

“Niset sot për Itali një ekip me 60 infermierë në ndihmë të kolegëve italianë për të përballuar emergjencën e krijuar nga virusi Covid-19”, ka theksuar Ambasada shqiptare.

“Janë nga e gjithë Shqipëria, nuk ndihen heronj, por miq të mirë!”, ka shtuar Ambasada.

“Për shqiptarët është e natyrshme: miku i mirë njihet në ditë të vështirë! Këto janë ditët më të vështira për miqtë tanë italianë, duhet profesionalitet, eksperiencë dhe maturi, por edhe kurajo e zemër”, ka nënvizuar Ambasada shqiptare në Itali.

“Këta vullnetarë kanë vërtet zemër të madhe! Mirësevini shqipe! Krenare për ju motra e vëllezër! “Është shtëpia jonë e dytë”! Shqipëri e vogël zemër e madhe!”, ishte mesazhi i Ambasadës së Shqipërisë në Itali.

Pas grupit të parë prej 30 mjekësh dhe infermierësh, ky është grupi dytë i përbërë prej 60 infermierësh që do të shërbejnë në veri të Italisë, në zonat më të goditura nga COVID-19.