Nuk dorëzoi dokumentet për vlerësimin e figurës, largohet nga detyra drejtori i Policisë Lezhë

Agjencia e Mbikëqyrjes Policore vendosi sot largimin nga detyra të Vehbi Bushatit me detyrë drejtor i Drejtorisë Vendore të Policisë Lezhë, në Drejtorinë e Përgjithshme të Policisë së Shtetit.

Vendimi i trupës së Vlerësimit të Agjencisë së Mbikëqyrjes Policore bazohet në ligjin “Për Vlerësimin Kalimtar dhe Periodik të Punonjësve të Policisë së Shtetit, Gardës së Republikës, Shërbimit për Çështjet e Brendshme dhe Ankesat në Ministrinë e Brendshme”.

Vendimi erdhi pasi Bushati nuk ka plotësuar dhe dorëzuar formularët e deklarimit të pasurisë, deklaratën e kontrollit të figurës dhe formularin e vlerësimit të aftësive
profesionale. Kundër këtij vendimi lejohet ankim brenda 45 ditëve nga data e njoftimit, në Gjykatën Administrative të Shkallës së Parë Tiranë.

Vehbi Bushati u emerua drejtor i Drejtorisë Vendore të Policisë Lezhë, ne 23 mars 2022.