A do të lobojnë për ndonjë kërkesë shqiptare Ahmeti dhe Thaçi?
Dy liderët e partive shqiptare, Ali Ahmeti i BDI-së dhe Menduh Thaçi i PDSH-së, pritet që sot në Shkup të takohen me kongresmenin amerikan Eliot Engel dhe me ambasadorin Jess Baily.
Nuk është publikuar ndonjë skenë e rendit të ditës së këtyre takimeve, megjithatë pritet që bashkëbiseduesit të diskutojnë për zgjidhjen e krizës politike në vend, raporton SHENJA.
Bisedimet për të tejkaluar ngërçin politik në vend kanë mbetur në udhëkryq dhe gjithnjë e më shumë kërkohet përfshirja më aktive e faktorit politik amerikan, që besohet se do të shërbente si motor për t’i çuar përpara çështjet e mbetura pezull. Në këtë aspket, është parlalajmëruar se në Shkup mund të vijë edhe Vitoria Nuland, ndihmës-sekretare amerikane e shtetit.
Amerikanët janë më të interesuar për zgjidhjen e krizës, por duket se do të ketë shumë punë për të thyer rezistencën e kryeministrit Nikolla Gruevski, i cili po mbështetet fuqishëm nga dy liderët shqiptarë, Ahmeti e Thaçi.
Dy krerët partiakë nuk duket se kanë ndonjë rol në këto bisedime, përveç se t’i bëjnë opozitë kërkesave të liderit opozitar Zoran Zaev, i cili është duke kritikuar ashpër këtë qëndrim të dy liderëve partiak.
Njohës të zhvillimeve politike theksojnë se në këto bisedime nuk janë duke u trajtuar çështjet për të cilat janë të intersuar shqiptarët në Maqedoni. Kongresmeni Engel është i njohur për mbështetjen e çështjes shqiptare, ndërsa nuk është e qartë nëse dy liderët shqiptarë do të lobojnë për ndonjë kërkesë shqiptare në këto bisedime, kur llogaritet lojaliteti i deritashëm ndaj liderit të VMRO-DPMNE-së.
