Agjencia e OKB-së: Ndërprerja e lundrimit në Hormuz po godet tashmë të korrat dhe po rrit çmimet e ushqimeve

Ndërprerja e lundrimit në Ngushticën e Hormuzit po lë tashmë gjurmë në të korrat në shumë vende, duke kërcënuar rendimente më të ulëta dhe çmime më të larta ushqimesh. Kështu deklaroi të enjten në Bangkok presidenti i Fondit Ndërkombëtar për Zhvillimin Bujqësor (IFAD), Alvaro Lario, sipas raportimit të Reuters, duke nënvizuar se efekti i mbylljes fillestare të ngushticës po fillon tani të ndihet në terren.

Sipas Larios, ndërprerjet në dërgesat e plehrave kimike, së bashku me kostot më të larta të karburantit dhe të transportit, po shtojnë shpenzimet përgjatë gjithë zinxhirit ushqimor. Situatën e rëndojnë edhe fenomeni El Niño dhe vështirësitë me furnizimet e grurit nga Deti i Zi.

Rezervat ekzistuese të plehrave dhe të karburantit e zbutën fillimisht goditjen, por pasiguria e zgjatur i ka bërë fermerët më të kujdesshëm në mbjellje dhe i ka shtyrë të përdorin më pak plehra. Edhe korrja e mekanizuar po bëhet më e shtrenjtë për shkak të çmimit më të lartë të karburantit.

Çmimet e produkteve bujqësore u rritën 13 për qind në tremujorin e tretë dhe, sipas kreut të IFAD-it, priten rritje të mëtejshme në tremujorin e fundit të këtij viti dhe në fillim të vitit të ardhshëm. Më të ekspozuarat janë vendet që varen nga importi i plehrave, karburantit dhe ushqimeve: Azia Juglindore për varësinë nga karburanti dhe vendet e Gjirit për importet ushqimore.

Irani e ka shtrënguar kontrollin mbi Hormuzin për t’i bërë presion Uashingtonit, ndërsa Shtetet e Bashkuara mbajnë në fuqi bllokadën detare ndaj porteve iraniane. Përplasja rreth ngushticës, një nga rrugët më të rëndësishme të energjisë në botë, po i kalon kështu kostot e luftës nga tregjet e naftës te tryezat e ushqimit në shumë vende.