Ahmetaj kundër Ramës për rrugën Tiranë‐ Durrës, fton të huajt ta zgjerojnë, qeveria projekt tjetër

Ministri i Ekonomisë ka gënjyer publikisht të gjithë investitorët e huaj që duan të hedhin paratë e tyre në Shqipëri. Nuk bëhet fjalë për ndonjë premtim, në ndonjë takim me individë të huaj, por për një dokument zyrtar, që përfaqëson interesat e Shqipërisë për thithjen e investimeve nga jashtë, shkruan sot e perditshmja ‘Panorama”.

Arben Ahmetaj, në raportin e tij, të cilin e shikojnë të gjithë ata që kanë interes për të investuar në Shqipëri, ka ofruar për biznesmenët një investim që nuk ekziston më. “Albania calls… A country of opportunities” (Shqipëria thërret, Një vend mundësish) është dokumenti zyrtar, ku Agjencia e Investimeve prezanton për të gjithë të interesuar e huaj mundësitë e investimit në vend.

Dokumenti që në faqen e parë mban thirrjen zyrtare të ministrit Ahmetaj të firmosur nga vetë ai. “Shqipëria po hap dokumentin zyrtar për investimet, mbyllet me fjalinë: “Sot Shqipëria është më shumë se kurrë e hapur për investitorët dhe ky vullnet do të vendosë suksesin ekonomik të vendit. Pikërisht për këtë arsye, sot më shumë se kurrë ne duam t’ju ftojmë sepse Shqipëria është një vend mundësish”. Deri këtu, gjithcka duket normale, bashkë me dozat e ndryshimit të madh, që ministri Ahmetaj shton në letrën e tij. Por dokumenti i Ahmetaj, jo vetëm nuk është serioz, por edhe i mashtron hapur investitorët e huaj. Në mundësitë që afrohen për investime, Ahmetaj rendit dhe autostradën Tiranë-Durrës. Ahmetaj fton të gjithë të huajt që të investojnë, jo pak, por deri në 120 milionë euro në këtë rrugë. Në kapitullin “Mundësitë e investimit në transport’, Ahmetaj thekson se një mundësi që qeveria u ofron investitorëve të huaj, është zgjerimi i kësaj autostrade.

“Një zgjerim i autostradës Tiranë-Durrës, që përfshin tri kalime në secilën anë. Kjo kontratë ka një vlerë mes 100-120 milionë eurove”. Kjo është oferta zyrtare e Ahmetaj për të gjithë investitorët e huaj. Po ku qëndron mashtrimi? Të gjithë ata që e kanë parë autostradën Tiranë-Durrës kanë vënë re një ndryshim kolosal. Në anët e saj janë mbjellë palma, të paktën deri në kthesën e Kasharit. Palmat dhe gjelbërimi në dy krahët e rrugës e bëjnë të pamundur zgjerimin e saj. Dhe rrethimi i saj me gjelbërimin është njoftuar publikisht nga kryeministri Rama, është tenderuar dhe kushton mbi 600 mijë dollarë.

Sipas projektit, gjelbërimi nuk le asnjë mundësi zgjerimi. Ndërsa thirrja e Ahmetaj duket qartë se është një ‘blof’ zyrtar.