Ahmeti vendos kryendeshjen, Prishtina rikthehet te fitorja ndaj Ballkanit

Prishtina ka shënuar fitore të rëndësishme në kryendeshjen e javës së 26-të në elitën e futbollit kosovar, duke e mposhtur Ballkanin me rezultat minimal 1:0, në përballjen e zhvilluar në Kampin Nacional të FFK-së në Hajvali.

Ndeshja u vendos në minutat e fundit, kur talenti 17-vjeçar Rin Ahmeti realizoi golin e vetëm të takimit. Ai pranoi topin brenda zonës dhe me një goditje të saktë e dërgoi në rrjetë, duke i siguruar skuadrës kryeqytetase tri pikë shumë të vlefshme.

Kjo fitore shënon një kthesë për Prishtinën, e cila i rikthehet triumfit pas pesë ndeshjeve pa fitore në kampionat. Njëkohësisht, ishte debutim i suksesshëm për trajnerin Alban Dragusha, i cili mori drejtimin e skuadrës ditë më parë.

Pas kësaj fitoreje, Prishtina ka 41 pikë në pozitën e tretë, katër më pak se Ballkani dhe Drita, me këta të fundit që kanë një ndeshje më pak të zhvilluar.