Al-Omair-Panariti: Memorandum bashkëpunimi në bujqësi e peshkim, do të eksportojmë ujin

Shqipëria dhe Kuvajti nënshkruan sot Memorandumin e Mirëkuptimit mes dy vendeve, për bashkëpunimin në fushën e bujqësisë,  mbrojtjen e bimëve, sigurinë ushqimore, shëndetin e kafshëve dhe peshkimit.

Ministri i Bujqësisë, Zhvillimit Rural dhe Administrimit te Ujrave Edmond Panariti, në një konferencën e përbashkët për shtyp të enjten në Tiranë, me homologun e tij kuvajtian Al-Omair, pas nënshkrimit të memorandumit, deklaroi se ka ftuar sipërmarrësit kuvajtjanë të investojnë në sektorin rural shqiptarë.

Gjithashtu, ministri Panariti pohoi se i ka kërkuar ndihmë Kuvajtit dhe për pastrimin e kanaleve kulluese.

Nga ana e tij, ministri i Bujqësisë së Kuvajtit, Al-Omair konfirmoi se, midis dy vendeve Shqiperi-Kuvajt, do të vendoset memorandumi bashkëpunimi në bujqësi e peshkim, ndërsa theksoi se Shqipëria ka potenciale të mëdha dhe të veçanta.

“Shqipëria ka potenciale të mëdha dhe të veçanta. Do të sjellim makineri për pastrimin e kanaleve. Do të eksportojmë ujin e pijshëm shqiptar”, tha Al-Omair.

Bashkëpunimi midis Shqipërisë dhe Kuvajtit në fushen e bujqësisë, konsiston në shkëmbimin e kërkimeve dhe eksperimenteve bujqësore në lidhje me rritjen e prodhimit, kultivimit të peshkut, investimeve të përbashkëta në fushën e bujqësisë, trajnimeve të stafit në fushën e prodhimit bimor, sigurisë ushqimore, prodhimit blegtoral dhe rritjen e eksport-importeve për produktet bujqësore dhe agroindustriale.

Ky bashkëpunim i ri mes palëve pritet të përmirësojë marrëdhëniet e ndërsjella nëpërmjet programeve të përbashkëta të bashkëpunimit Shqipëri-Kuvajt, bashkëpunimin në kërkime shkencore, ekspertizë dhe teknika për arritjen e objektivave të përparimit të bujqësisë në të dy vendet, si dhe të gjenerojë fonde për mbështetjen e projekteve të përbashkëta për të cilët është rënë dakord nga të dy vendet. 

Nënshkrimi i Memorandumit të Mirëkuptimit Shqipëri-Kuvajt në fushën e bujqësisë, vjen brenda një kohe të shkurtër, pas takimit që zhvilloi në fillim të këtij muaji, Ministri i Bujqësisë, Zhvillimit Rural dhe Administrimit të Ujërave, Edmond Panariti me ambasadorin e ri të Shtetit të Kuvajtit në Shqipëri, Fayez Mishari Al-Jassim, në Tiranë.

Gjatë konferencës për shtyp, ministri Panariti, i pyetur mbi rrezikun e përmbytjeve në vend, tha se,  dy grupe pune ndodhen në terren për  të  mbajtur në kontroll çdo zhvillim. Ndërkohë, duke u ndalur  tek dëmshpërblimet nga përmbytjet, ministri pohoi se qeveria do i përmbahet premtimeve.

“Ndodhen 2 grupe në terren. Qeveria do i përmbahet premtimeve për dëmshpërblimet. Bizneset të sigurohen për përmbytjet”, tha Panariti.