Alarm bombë në Split: evakuohen pasagjerët e avionit të Air Serbia-s, asnjë eksploziv nuk u gjet

Pasagjerët e avionit të kompanisë Air Serbia në linjën Split–Beograd u detyruan të linin aeroplanin, pasi policia nxori prej tij një pasagjer, siç shkruan portali kroat Dnevnik.hr, të cituar nga gazeta serbe Danas. Avioni duhej të nisej nga Spliti për në Beograd në orën 15:20.

Sipas rrëfimit të një pasagjeri për Dnevnik.hr, teksa qëndronin në pistë, në avion hynë papritur disa policë, disa me uniformë e disa me rroba civile. “Pashë përmes dritares makinën e policisë pranë avionit. Nxorrën një zotëri me flokë gri që ishte ulur në rreshtin e tretë ose të katërt”, tha pasagjeri. Askush në avion nuk e dinte çfarë po ndodhte; kur e pyeti stjuardesën, ajo iu përgjigj shkurt: “Përmendi fjalën bombë”.

Disa pasagjerë, nga frika, thjesht u larguan vetë nga avioni, ndërsa piloti rreth orës 15:40 njoftoi përmes altoparlantit se të gjithë pasagjerët duhej të linin avionin sepse ai duhej të kontrollohej për arsye sigurie, shton Dnevnik.hr.

Policia e Splitit konfirmoi për portalin kroat se ishte arrestuar një pasagjer 75-vjeçar, i cili rreth orës 15:25, para nisjes, i kishte thënë stafit se në avion kishte bombë, duke shtuar se nuk po bënte shaka. “Avioni u zbraz dhe do të kontrollohet sërish para nisjes, si dhe do të bëhet rikontroll i pasagjerëve dhe bagazheve”, thanë nga Drejtoria e Policisë së Splitit dhe Dalmacisë.

Pak pas orës 19:00 policia e Splitit njoftoi se ishte kryer kontrolli kundër-diversion i avionit, pasagjerëve dhe bagazheve. “Nga kontrolli nuk u gjet asnjë mjet shpërthyes, pas së cilës avioni me pasagjerët u largua nga aeroporti. Ndaj 75-vjeçarit të arrestuar është në vijim hetimi kriminal për dyshimin se ka kryer veprën penale të shkaktimit të alarmit të rremë”, i thanë policia Dnevnik.hr-së.