Ambasada amerikane në Moskë u bën thirrje qytetarëve amerikanë të largohen menjëherë nga Rusia pas frikës nga murtaja

“Qytetarët amerikanë që ndodhen aktualisht në Rusi duhet të largohen menjëherë”, tha ambasada të martën, siç njofton New York Post. Ambasada tha se është në dijeni të raportimeve nga rajoni i Irkutskut për një rast të dyshuar fatal të murtajës pneumonike, si dhe për masa karantine dhe mbyllje spitalesh në Irkutsk. Ajo paralajmëroi gjithashtu se qeveria amerikane ka “aftësi të kufizuara” për të ndihmuar qytetarët amerikanë në Rusi, veçanërisht jashtë Moskës.

Paralajmërimi erdhi pasi presidenti Donald Trump tha të martën në mbrëmje se ka caktuar “shumë shpejt” një bisedë telefonike me presidentin rus Vladimir Putin për vdekjen misterioze të teknikes 28-vjeçare të Institutit Anti-Murtajë në Siberi. “Jemi në diskutime shumë të thella. Do të jemi në gjendje të raportojmë për të ndoshta nesër”, u tha Trump gazetarëve në Shtëpinë e Bardhë, duke lënë të kuptohet se administrata do të ndajë më shumë informacion të mërkurën.

Sekretari amerikan i Shtetit, Marco Rubio, i bëri thirrje Rusisë të jetë transparente gjatë një konference shtypi në Reikjavik të martën, siç raporton USA Today. “Ne e inkurajojmë Rusinë të jetë transparente dhe të ndajë më shumë informacion me botën, në mënyrë që të gjithë ne të reagojmë siç duhet”, tha Rubio, duke shtuar se do të ishte “e papërgjegjshme” të spekulohet pa pasur të gjitha informacionet.

Zyrtarët amerikanë po e ndjekin me vëmendje situatën në Rusinë juglindore, pasi punonjësja e laboratorit në institutin që studion murtajën vdiq papritur nga “pneumoni me origjinë të panjohur”. Bëhet fjalë për Daria Shipilova, 28 vjeçe, punonjëse e Institutit Anti-Murtajë të Irkutskut të Siberisë dhe Lindjes së Largët, rreth 240 kilometra larg kufirit të Rusisë me Mongolinë. Sipas raportimeve, ajo u infektua pasi theu aksidentalisht një tub provash që përmbante një patogjen vdekjeprurës.

Kremlini ka dhënë pak detaje publikisht, duke thënë se agjencia ruse e mbrojtjes së shëndetit, Rospotrebnadzor, po e monitoron situatën, ndërsa autoritetet lokale thonë se kanë marrë “masa anti-epidemike” në rajon. Ndërkohë, shkencëtarë amerikanë po shprehin alarm: biologu i Institutit të Teknologjisë së Masaçusetsit (MIT), Kevin Esvelt, shkroi se provat tregojnë për “një ekspozim tragjik ndaj një patogjeni vdekjeprurës, me sa duket të transmetueshëm, të cilin Rusia duket se heziton ta identifikojë publikisht”.