Ambasadorët tërhiqen, Lu e Vlahutin: Të diskutohet vetëm propozimi hibrid
Ambasadori i Shteteve të Bashkuara, Donald Lu dhe ajo e Bashkimit Europian, Romana Vlahutin do të marrin pjesë në tryezën e propozuar nga Ilir Meta për reformën në drejtësi nëse në këtë tryezë diskutohet vetëm për propozimin hibrid të Victoria Nuland.
Diplomatët thonë se kanë informuar për këtë qëndrim edhe kreun e Kuvendit, Ilir Meta.
“Pas deklaratës së Lulzim Basha, ambasadorët Vlahutin dhe Lu informuan kreun e Kuvendit se e kanë të pamundur të marrin pjesë në diskutime”, thuhet në deklaratë.
“Zoti Basha foli për një qeveri teknike dhe nuk e përmendi aspak propozimin hibrid, që diskutoi me Victoria Nuland më 10 korrik. Nëse zoti Basha i qëndron zotimit të mëhershëm për të negociuar vetëm në bazë të propozimit hibrid, vetëm atëherë ambasadorët do t’i bashkohen tryezës”, vijohet në deklaratën e përbashkët të dy ambasadorëve.
