Arben Frroku refuzon të ekstradohet nga Holanda në Shqipëri

Arben Frroku, vëllai i ish- deputetit Mark Frroku, i dënuar për vrasjen e kryekomisarit Dritan Lamaj pasi u arratis nga Shqipëria u arrestua nga autoritetet policore në Holandë.

Prej kohësh shteti shqiptar është në pritje të ekstradimit të tij, ndërsa gazeta holandeze “Telegraaf” i ka kushtuar një shkrim duke e quajtur si anëtar të spikatur të Partisë Kristiandemokrate dhe me një të kaluar kriminale.

Shqiptari u arrestua në një aeroport të Holandës më 9 maj. Frroku rezulton i dënuar për vrasje dhe cilësohet një kryemafioz.

Arben Frroku ka kundërshtuar ekstradimin e tij për në Shqipëri ndërsa shteti shqiptar ka dorëzuar dosjen e tij në Hagë. Frroku zgjodhi të fshihej në Holandë me një identitet të rremë siç bëjnë shumë kriminelë të tjerë nga Italia apo Britania, shkruan gazeta.

“Telegraaf”, thekson se veçse bëjnë një jetë të fshehtë në Holandë ata vazhdojnë edhe aktivitetin e tyre kriminal gjatë qëndrimit atje.

Më 24 shkurt të vitit 2013, kryekomisari i Policisë Dritan Lamaj, 41 vjeç, u vra me kallashnikov ndërsa ndodhej në makinën e tij Lancia. 41-vjeçari ndërroi jetë në spital.

Autorët e larguan me një makinë BMË, automjet në të cilin u gjetën shenjat e gishtërinjve dhe fije floku të biznesmenit Arben Frroku.