Arrestohen dy shtetas turq në Fushë Kosovë, njërit i gjendet marihuanë e tjetrit revole

Dy shtetas të Turqisë janë arrestuar në Fushë Kosovë, pasi policia gjeti marihuanë dhe një armë zjarri gjatë kontrollit të një banese, siç raporton “Betimi për Drejtësi”, duke iu referuar raportit 24-orësh të Policisë së Kosovës.

Rasti ka ndodhur më 13 tetor, rreth orës 23:58, në rrugën “Presheva”, pas një informate të pranuar nga policia. Zyrtarët policorë kanë takuar në lokacion të dyshuarin e parë, shtetas turk, te i cili është gjetur një qese me substancë të dyshuar narkotike të llojit marihuanë, në sasi prej 62,55 gramësh.

Gjatë kontrollit të banesës, në dhomën e të dyshuarit tjetër, po ashtu shtetas turk, është gjetur një revole me një karikator dhe gjashtë fishekë. Substanca narkotike dhe arma janë sekuestruar nga policia.

Me vendim të prokurorit kujdestar janë hapur dy raste të ndara — për posedim të paautorizuar të narkotikëve dhe për mbajtje të paautorizuar të armëve — ndërsa pas intervistimit të dyshuarit janë dërguar në mbajtje. Personat e përmendur konsiderohen të pafajshëm, përveç nëse fajësia e tyre vërtetohet nga gjykata me vendim të formës së prerë.