Arrestohet administratorja e kopshtit privat, dhunonte vogëlushin 3-vjeçar

Policia e Tiranës ka arrestuar Anjeza Shabanin, administraroren e kopshtit privat në Sauk “Diren” pas videoskandalit të publikuar në media ku ajo dhunonte një fëmijë 3 vjeç.

Mësohet gjithashtu se Anjeza Shabani është arrestuar bashkë me pesë punonjës të tjerë të kopshtit privat që ajo drejtonte.

Prokuroria e Tiranës në bashkëpunim edhe me prokurorinë ka nisur procedimin ndaj Anjeza Shabanit, administratores së kopshtit. Ajo u filmua nga një kamera e vendosur nga emisionin investigativ Stop pas denoncimit që babai i një djali 3 vjeçar bëri, se fëmija i tij vinte në shtëpi në gjendje të rëndë. Në trupin e tij kishte shenja dhune cka u faktua edhe nga video skandaloze ku Anjeza Shabani shfaqet duke qëlluar vazhdimisht të voglin e duke i bërtitur.

Skenë e tmerrshme në sytë e fëmijëve të tjerë por edhe të edukatores së tyre, tek e cila djali i vogël mundohet të gjejë mbështetje. Por pa shpresë pasi edukatorja nuk bën asnjë reagim ndaj veprimeve monstruoze të administratores. Anjeza Shabani ka qenë gazetare dhe drejtuese emisioni në një televizion informativ në Shqipëri.

Menjëherë pas publikimit të videos, në rrjetet sociale shpërthyen reagimet e shumta dhe revolta e qytetarëve ndaj një veprimi të tillë me fëmijët e pafajshëm ku prindërit paguajnë para për sigurinë e tyre.