Arrestohet një person në Klinë, policia i sekuestron një armë AK47

Policia e Kosovës ka arrestuar një person në Klinë dhe i ka sekuestruar një armë zjarri AK47, së bashku me një karikator, siç njofton Telegrafi duke iu referuar njoftimit të Policisë.

Sipas njoftimit që e përcjell Telegrafi, më 22 tetor në Stacionin Policor në Klinë ishte raportuar një rast kanosjeje, në të cilin ishin përfshirë dy të mitur, ndërsa ngjarja kishte ardhur si pasojë e një mosmarrëveshjeje mes tyre.

Gjatë hetimit, trajtimit dhe intervistimit të personave të përfshirë në rast, hetuesit pranuan informacion për një rast tjetër, atë të mbajtjes në pronësi, kontroll ose posedim të paautorizuar të armëve. “Zyrtarët policorë përgjegjës menjëherë kanë ndërmarrë veprimet e nevojshme hetimore dhe kanë identifikuar personin e dyshuar. Me këtë rast personi i dyshuar është arrestuar, ndërsa tek i njëjti është gjetur dhe është sekuestruar një armë AK47, një karikator”, thuhet në njoftimin e Policisë, të cilin e citon Telegrafi.

Pas intervistimit nga hetuesit, i dyshuari është liruar në procedurë të rregullt, njofton Telegrafi.