Art Basel Paris mbyllet dy ditë më herët për shkak të protestave në Francë

Art Basel Paris do të mbyllet dy ditë më herët se sa ishte planifikuar. Panairi do të përfundojë të premten, më 23 tetor, në orën 19:00, megjithëse programi kryesor në Grand Palais ishte parashikuar të vazhdonte deri të dielën, më 25 tetor, siç njofton Hyperallergic.

Vendimin organizatorët ua komunikuan ekspozuesve me një email, ku thuhet se mbyllja e parakohshme bëhet “në dritën e demonstratave të mundshme në Paris këtë fundjavë dhe në interes të mbrojtjes së vizitorëve tanë”. Ky është zhvillimi i dytë i jashtëzakonshëm për këtë edicion: më 17 tetor, gjatë instalimit të panairit, Grand Palais u mbyll përkohësisht me urdhër të autoriteteve, mes protestave mbarëkombëtare për sistemin arsimor dhe shërbimet publike në Francë.

Kryeministri francez Sébastien Lecornu ka deklaruar se në fundjavë, për të mbajtur nën kontroll protestuesit, do të angazhohen forca ushtarake të Operacionit Sentinelle në vend të policisë. Operacioni nisi pas sulmeve të janarit 2015 ndaj redaksisë së Charlie Hebdo dhe dyqanit Hyper Cacher dhe ka si qëllim të deklaruar mbrojtjen nga terrorizmi.

“I inkurajojmë fort galeritë t’i mbajnë prezantimet e paprekura deri në mbylljen e panairit nesër në orën 19:00 dhe kërkojmë që çmontimi i përgjithshëm të mos fillojë derisa të jepen udhëzimet për hyrjen dhe largimin”, shkruan në email Vincenzo de Bellis, drejtori artistik i Art Basel, dhe Karim Crippa, drejtori i panairit të Parisit. Një galerist, që kërkoi të mbetet anonim, konfirmoi për Hyperallergic se udhëzimet për operimin dhe çmontimin janë ende në pritje.

Mbyllja vjen edhe ndërsa grupe artistësh dhe sindikata, përfshirë Syndicat National des Artistes Plasticiennes, që përfaqëson artistët vizualë dhe dizajnerët grafikë, kishin paralajmëruar një protestë jashtë panairit të shtunën në orën 16:00. Një fletushkë e shpërndarë në internet denoncon “privatizimin e kulturës dhe një art të drejtuar nga tregu që shoqëron zhvendosjen e vendit tonë drejt ekstremit të djathtë”.