Atentati ndaj Sulos- Naço: Të vihen para përgjegjësisë autorët

Ministria e Drejtësisë e ka ndjekur me shqetësim ngjarjen e rëndë të ndodhur mëngjesin e sotëm ndaj Drejtorit të Burgut të Fushë Krujës, Arben Sulo.

Ky institucion po ndjek me vëmendje të veçantë dinamikën e ngjarjes dhe shpreh të gjithë gatishmërinë për të ndihmuar në hetimin dhe zbardhjen e plotë të saj. Me marrjen e njoftimit mbi ngjarjen, Ministri i Drejtësisë, Nasip Naço ka urdhëruar Drejtorinë e Përgjithshme të Burgjeve për marrjen e masave që do të mundësojnë forcimin e sigurisë në sistemin penitenciar në tërësi, duke informuar në mënyrë periodike-ditore mbi situatën dhe zhvillimet e brendshme të këtij sistemi.

Gjithashtu, ministri i Drejtësisë, Nasip Naço, inkurajon organet përkatëse të vënë sa më shpejt përpara përgjegjësisë autorët, ndërkohë që janë marrë të gjitha masat që kjo ngjarje e rëndë të mos ketë asnjë pasojë dhe të mos ndikojë në mbarëvajtjen e mëtejshme të punës në sistemin penitenciar.

Ministria e Drejtësisë i gjendet pranë z. Arben Sulo dhe familjes së tij, ndërkohë që shprehim vullnet të plotë për të vijuar punën në forcimin, ruajtjen dhe zbatimin e plotë të ligjit, duke mos u tërhequr përballë ngjarjeve të tilla.