Balili fshihet në Sarandë? FNSH mësyn te “Santa Quaranta”

Jo vetëm polica dhe FNSH, por edhe Shërbimi Informativ prej disa ditësh janë ngritur në këmbë për të kapur Klemant Balilin, të etiketuar si “Eskobari i Ballkanit”, pasi drejtësia shqiptare e shpalli në kërkim.

Ndërsa dje u fol se SHISH kishte shpërndarë informatorë në çdo cep të Tiranës, ku dyshohej se mund të ishte fshehur Balili, që në orët e para të mëngjesit janë parë forca të shumta të policisë dhe FNSH-së në Sarandë e fshatrat përreth.

FNSH-ja po kontrollon në resorin e Balilit në Sarandë, “Santa Quaranta”.

Po ashtu bëhet me dije se në komisariatin e policisë së Sarandës ndodhen drejtues të policisë nga Tirana e Vlora.

Më 11 dhjetor policia kontrolli edhe banesën e Balilit, aty ku arrestoi një tjetër person, si dhe gjeti 2 armë, por jo të shumëkërkuarin, ndërsa pak ditë pas këtij operacioni SHKB nisi hetimet për dekonspirim në të paktën 3 operacione për kapjen e tij.

Tre janë efektivët të cilët janë pezulluar nga puna deri në përfundim të hetimeve, ndërsa shërbimi i kontrollit të brendshëm mbetet i rezervuar në dhënien e informacioneve për këtë çështje.